Un arquetipu ( del griegu, arjé, "huenti", "enceti" o "orihin", y τυπος, typos, "impresión" o "moelu") es el patrón ehempral del cual procein  otrus ohetus, ideas o conceutus. Ena filosufía e Platón se prenuncian las hormas sustancialis (ehempraris etelnus y prefeutus) de las cosas que desistin etelnamenti nel pensamiento divinu.

Un arquetipu es un moelu ehempral de ideas o conocimientus del cual proceinn otrus tantus pa hormal lus pensamientus y atituis propias de ca endividu, de ca balburda, de ca socieá, encrusu de ca sistema.

Nel libru “Realiá del arma”, Jung proponi que nel mundu primitivu tolus ombris puseian una especie d’arma común, peru conel pasal del tiempo y cona evolución, sulhio un pensamiento y una concencia endevidual qu’ayuó en gran meia cona holmación de curturas propias de ca tipu e pensal y ca tipu e proceel. Una persona está entegra pol proceeris rehius pol arquetipu, huntu conus deferentis caminus y lus sus estayus. Desistin tres caminus, lus cualis son conocimientu, puel y amol.

 Ya Platón creía que la cencia consisti enu universal y a la cual se pue llegal meyanti l’astración. Pal hundaol del idealismu, la mayol celteza se enhalla ena mayol astración. Asina deferencia dos mundus, el de las cosas sensibris, uñiu conel nu sel y el de lu enteligibli, qu’es lu real en sí mesmu, el tipu, la idea o el ehempru, que reprouci las cosas sensibris pola su palticipación de las ideas.

Ena eda meya lus escolasticus usan la parabra arquetipu, sobri to aquellus que s’acelcan al sentiu pratonicu combinau cona dotrina aristotélica pol santu Tomas d’ Aquinu, comu la idea primoldial, la que gobilño a la creación del mundu.

Mas muelnamenti, pa Locke, lus arquetipus son ideas que nu tien semehanza con desistencia denguna, ni tan siquia conus ohetus estelnus. Nu lus concibi comu copias las cosas comu hadia Platon.

Goethe en Faustu tamien usa el telminu comu idea mairi, comu la idea premoldial de las cosas.

Asina un arquetipu nu eha e sel la mehol horma e la idea.

To estu nu vieni a cuentu peru lu apellu a lu siguiente. Lus estereotipus.

Un estereotipu es una imahin mental mu simprifica y muy pocu detalla acelca duna balburda de henti que tiene cieltas cualiais y caraiteristicas compartias.

Un estereotipu es una visión heneralista y prehuciosa duna presona, danduli a esa persona cona primel guipa unus detelminaus calificativus.

Lus estereotipus mus valin pa prehuicial, que nu eha e sel una horma de nu gastal  enerhia nel pensamientu. Una horma e discriminal, descartal y categorizal sin hadel grandis efuerzus. Asina con mu poquina enformación gracias a lus estereotipus que tos tenemus de las rehionis y comuniais mus hademus una idea heneral , un arquetipu, un moelu, una idea heneral del abitanti moelu y prehuiciamus hidiendumus una idea simpri de comu ebi e sel la persona simprimenti con sabel dandi es.

Estu pa lus estremeñus es pan de tolus días. En abondu lugaris al sintil l’acentu estremeñu y nu sabel categorizalu de seguía preguntan dandi eris, nu me suena el tu acentu ... Cuandu das las despricacionis, si creis que tien que dalsi y vali la pena, vieni la solpresa.. conchu ¡¡ nu tenia ni idea de que pa Estremaura se tiene esta horma e palral ¡¡ y altoncis suertan la retahíla e ideas preconcebías que se tienin sobri"l comu semus y comu tenemus que sel.. y mairi mia conas cosas que ties que tragal....

Estu ocurri con tolas rehionis craru, peru a mi m’atañi la muestra.

El sentiu d’encetal cona parrafá de lus arquetipus es pa afechal la boca a quien idi qu’asina un puen palral mas que lus campusinus y un pue idilsi na enteresanti n’estremeñu. Nu es el chascu e ponelmi a hadel denguna tesis centifica, ni a dal despricacionis sobri física cuántica n’estremeñu ( que puel se puedi ...)

Si vus te pasa dalguna anedota asina hadle favl de ponela qu"asina tamien puemus hadelmus sigun andi seya pasau y dandi seya la presona, un estereotipu deferenti en basi a la idea que tienin de musotrus y d"Estremaura, qu"ay que vel cuantu cuatainu anda suertu....